الحرافيش

ملحمة الحرافيش..اجمل رواية قراتهاوالتى خطها بعظمة واعجاز..الاديب الاول..عم نجيب..كنت احيانا اسمع من يقولوا ان الرواية بها اسقاط رمزى على رجال الثورة ..حيث فكرة العدالة التى انفرط عقدها..ولكننى لم استطع حقا ان اربط بينهم وبين سلالة الناجى العظيم..ولكن المؤكد عندى والذى لا رمزية فيه.. هو ان الشعب المصرى يمثل بلا شك شعب الحرافيش المتطلع الى العدالة بشغف..دائما يحلم بها ..دائما ينتظرها ولكنه لا يسعى اليها ابدا..نعم نحن الحرافيش بضعفهم الابدى الذى يفسد اجمل ما فينا من نبل واصالة..
نعرف كيف نحب رجالنا العظام حتى التقديسولكننا لا نؤازر الخير الذى فيهم..لاننا ننتظر الصدفة التى تاتى بهم الينا لنعشقهم حتى الثمالة ثم نبكيهم ونرثيهم وننسى ما كان منهم..وننتظر من سياتى به القدر..وعندما نجد مصائرنا ومصرنا فى يد الفاجر..نكتم غيظنا وتدور الهمسات فى الازقةتحكى عن الظالم ..تسبه وتلعنه وتخوض فى عرضه ..كل هذا فى الظلام اما فى النور فتلهج الالسنة بحمده..اسم الله عليه ..اسم الله عليه..اخترناه اخترناه واحنا معاه لما شاء الله
اليس هذا هو حالنا..ولكن رغم كل شىء..ورغم كل السواد الذى نتخبط فيه..مازلت اشعر ان هناك امل وان هذه الايام تحمل لنا شيئا جديدا لو نتعود عليه..نحن الشعب العتيق الموغل فى القدم والذى لم يطرد ابدا احد حتى ظلمته كان يصبر عليهم .يغوروا او تيجى مصيبة تاخدهم ..قد ان الاوان ان نتغيرلاننى وبحق مللت جدا جدالدرجة اننى احيانا اكفر بهذا الشعب الذى لم يكن ابدا..ثورجى وواخد الدنيا غلابا
لذلك اتوجه الى الله بقلب حرفوشة اصيلةوادعوه ان يتعلم هذا الشعب التمرد..ان يقول لا..يقول لا
.

اغنى رجل فى مصر

تفتكر عزيزى المواطن مين هوه اغنى رجل فى مصر .. ممكن واحد يطلع يقوللى اكيد احمد عز اللى بيقولوا انه عمل اربعين مليار فى ست سنين ولا واحد تانى يقولى لا ده انا قريت فى مجلة فوربس ان ساويرس هوه اغنى واحد فى مصر..طبعا هوه ده المتوقع .. لكن الحقيقة اللى واضحة جدا واللى محدش واخد باله منها ان مبارك هوه اغنى واحد فيكى يا بلد .. يطلع واحد يقوللى طب انتى تعرفى ثروته كام.. قال يعنى حط العقدة فى المنشار.. اكمن محدش بيجيب سيرة املاك مبارك فى اى وسيلة من وسائل الاعلام.. ويجيبوا سيرتها ليه اصلا وهى واضحة زى الشمس.. طب حد فيكوا ميعرفش مصر.. ايوه هى دى املاااااااك مبارك وتقوللى عز وساويرس..دى بلد بحالها.. شوف انت بقى.. يجى مليون كيلو متر على ناصية افريقيا وكمان فى حتة فى اسيا وشواطىء متعدش اشى بحر احمر واشى بحر متوسط.. وبيجرى فيها نيل يا جدعان.. وكل ده كوم وعبيد السيادة كوم تانى.. فوق السبعين مليون رجالة وستات وشباب وبنات قمرات زى الشربات.. واحقاقا للحق الناس دى شايفة شغلها تمام ومحدش فيهم بيفتح بقه مع صاخب المخل .. وحتى القلة المنحرفة اللى بتعترض الراجل الكبير بيعرف يادبها كويس وعاملها مراكز تاديب وتهذيب وتقليع وتفشيخوربنا يخلى قانون الطوارىء ..ما هى صحيح البلد بتاعته بس اصل هوه راجل حقانى وكله بالقانون وعلى راى المثل اكسر للشعب ضلع يطلع له ستة وسبعين
عشان كده انا شايفة ان البلد دى بجد تستاهل تدخل موسوعة جينيس للارقام القياسية لانها اكبر عزبة فى العالم او على راى اخوانا الشوام اكبر ضيعة فى العالم وبينى وبينكم هى فعلا ضايعة .. ضايعة
مريم
اسكندرية