اغنى رجل فى مصر
تفتكر عزيزى المواطن مين هوه اغنى رجل فى مصر .. ممكن واحد يطلع يقوللى اكيد احمد عز اللى بيقولوا انه عمل اربعين مليار فى ست سنين ولا واحد تانى يقولى لا ده انا قريت فى مجلة فوربس ان ساويرس هوه اغنى واحد فى مصر..طبعا هوه ده المتوقع .. لكن الحقيقة اللى واضحة جدا واللى محدش واخد باله منها ان مبارك هوه اغنى واحد فيكى يا بلد .. يطلع واحد يقوللى طب انتى تعرفى ثروته كام.. قال يعنى حط العقدة فى المنشار.. اكمن محدش بيجيب سيرة املاك مبارك فى اى وسيلة من وسائل الاعلام.. ويجيبوا سيرتها ليه اصلا وهى واضحة زى الشمس.. طب حد فيكوا ميعرفش مصر.. ايوه هى دى املاااااااك مبارك وتقوللى عز وساويرس..دى بلد بحالها.. شوف انت بقى.. يجى مليون كيلو متر على ناصية افريقيا وكمان فى حتة فى اسيا وشواطىء متعدش اشى بحر احمر واشى بحر متوسط.. وبيجرى فيها نيل يا جدعان.. وكل ده كوم وعبيد السيادة كوم تانى.. فوق السبعين مليون رجالة وستات وشباب وبنات قمرات زى الشربات.. واحقاقا للحق الناس دى شايفة شغلها تمام ومحدش فيهم بيفتح بقه مع صاخب المخل .. وحتى القلة المنحرفة اللى بتعترض الراجل الكبير بيعرف يادبها كويس وعاملها مراكز تاديب وتهذيب وتقليع وتفشيخوربنا يخلى قانون الطوارىء ..ما هى صحيح البلد بتاعته بس اصل هوه راجل حقانى وكله بالقانون وعلى راى المثل اكسر للشعب ضلع يطلع له ستة وسبعين
عشان كده انا شايفة ان البلد دى بجد تستاهل تدخل موسوعة جينيس للارقام القياسية لانها اكبر عزبة فى العالم او على راى اخوانا الشوام اكبر ضيعة فى العالم وبينى وبينكم هى فعلا ضايعة .. ضايعة
مريم
اسكندرية
4 Comments:
مصر طول عمرها للمصرين ، حتي لما فرعون قال كلمته الشهيرة أليس لي ملك مصر وهذه الأنهار ، راح في ستين داهيه عقبال إلي في بالي
عظيمة يا مصر (مقطع من أغنية) شهيرة
البلد إلى بتتسرق من 7000 سنه ولسه فيها ناس لقيا تاكل تبقى دى مصر..مقولة من فيلم لنور الشريف
كاتب خفى
katbkhfe@yahoo.com
أنت من الاحرار يا مريم
وياريت تهدى أعصابك وبلاش الكلام ده عشان ماعنديش استعداد أشرحلك بالتفصيل ايه اللى ممكن يحصلك
صحيح عشان اعمل حسابى انا وجايلك
بتحبى الحلاوة سادة والا بالفسدق؟
سلام عليكي يا مريم
عارفة انتي بقي مين اغني واحد في مصر
انسان بسيط فرحان بعياله حواليه مراعي ربنا في حياته و باب بيته مقفول عليه ،مكفي بيته و مش مديون .........
تفتكري كده بقي كام واحد غني فيم مصر؟؟؟؟
سلام
مها
Post a Comment
<< Home