الحزن

هواياتى كتير

منها الحزن

أنا أصلى بموت ع الآخر فى الحزن

وغاويه

وباحبه زى الكيف

ما هو صاحبى

باخده معايا فى كل مكان..من غير تكليف

بينام جنبى قبل ما أنام

وباشاركه الأحلام

يشاركنى الأحلام

وبياكل ويايا فى كل طعام

واما أقعد أفكر حزنان

بيجينى الحزن ويقعد جنبى ..علشان

أنا صاحبى الحزن

والحزن اللى بيسكن جوايا أنواع

حزن مبيجيش غير وقت الحزن

وحزن معايا على طول

بامتلكه

مع انه من المجهول

مالهوش أم

ويتيم الأب

نابت زى الطحلب فى البحر

وبيفرز غمه زى العصارات

فى البرد بيلسعنى وف عز الحر

وف عضمى بيخش

ما بيهمدش..ودايما شغال

لا اجازة إعتيادية ولا اعطال

بيجينى فى كل ميعاد

فى الضلمة..فى النور

فى الموسم..فى الأعياد

ما هو مش ضيف

أصل أنا كييف فى جميع أنواع الحزن

وهوه كمان كييف

والحزن اللى قالبلته أنواع

فيه حزن مثقف جدا ومعاه أعلى الشهادات

وحزن يادوبك بيفك الخط

وحزن من السقى الدارج

وكمان فيه حزن بيستورد م الخارج

فيه صنف كويس جدا من دول الإمارات

والصنف التانى من مصر

الصنف الأول حزن البهلوانات ع البهلوانات

والتانى حزن القهر

الحزن اللى تحس بإنك مش حزنان

أما الحزن بتاعى..ده شئ مخصوص

بأقعد أمزمز فيه ع الكرسى وأنا مجعوص

زى الأفيون

حزن إتعودت عليه

لابد فى هدومى

فى قميصى العرقان..وفى نومى

وبأشيله فى جيبى

زى روشتة كاتبهالى الدكتور

أنا مبسوط

فرحان جداً

ممنون

أنا أول واحد فى الكون

أدمنت الحزن

وبقيت كييف

مع إنى بموت جداً م الضحك

على أى كلام تخريف

بيقوله واحد هلفوت

....

شعر معتق ل محمد كُشيك