كل سنة وكل أصحابى المدونين طيبين ومعيدين.. سواء بالتوقيت السعودى او السيستانى المهم اننا نعيد وخلاص..وناكل لحمة بالهبل
أصلى بحب اللحمة مووووووت ..مع انى ميبانش عليا ولا انا اكيلة والله وشبه نساك التبت..لكن فعلا الفتة واللحمة بالنسبة لى من امتع متع الحياة..عشان كده بعزعيد الأضحى جدا..حيث تتهافت علينا اللحوم من كل حدب وصوب ..والصبح لحمة والعصر لحمة وبالليل لحمة لحد ما الواحد بيقرب يمأمأ الحقيقة
فعلا أيام غير عادية..خاصة لواحدة زيي بتنتمى للطبقة اللى قاعدة على خط الفقر ومدلدلة رجليها_ما هو بصراحة ربع كيلو اللحمة اللى امى بتطبخ لنا عليه ده مش للأكل خالص..احنا بنشمه
عشان كده أنا عايزاكوا تركزوا فى الأكل ومالكوش دعوة بكلام الدكاترة عن المعدة والقولون والبواسير وكل الهجص ده..عيشوا الأجواء بذمة..اهبروا بضمير..عوموووا على وش الفتة وارفعوا ايديكم بالدعاء وقولوا اللهم ديمها علينا لحمة
posted by مريم @ 11:47 AM
20 Comments:
كل سنة وانتي طيبة
عيد سعيد
كل لحمي لحد ما تتخني
عمووووووور الامووور
ليك وحشة يا راجل
كل سنة وانت طيب يا سيدى ومتخفش انا مش محتاجة وصاية
كل سنة وانتي طيبة يا احلى مريم في الدنيا
اتمنى لك في هذه المناسبة ان تحققي كل ما تتنمين وان تسعدي بكل ما يسعدك ويفرح قلبك فأنت تستحقين كل خير وكل امل وكل سعادة
اما احنا فخلينا ليوم الجمعة يعني حنعيد بعديكو بيومين ؟؟؟ شفتي تخلف اكتر من كده ؟؟ اكيد لا
لك مني كل المودة والتقدير ومرة اخرى كل عيد وانتي باحسن حال
الطيب
انا برضه بحب اللحمة
ومش بيبان علي
كل عام وانت بخير
عيد سعيد
ويجعلك ربي من عواده
الطيب
كل سنة وانت طيب وربنا يخليك ع الدعوتين الحلوين دول
اما بقى ع التخلف فمتخفش ده للركب والحمد لله
سلام
...
ياسمينا
ازيك يا سمسم والله وحشتينى بجد
كل سنة وانتى طيبة وبخير وهايصة فى اللحمة
عيد سعيد عليكى
كل سنة وانتى طيبة
بالراحة شوية فى موضوع اللحمة دة
ومتنسيش حديث الرسول اللى معناة
ان شر وعاء يمليه المرء هو معدته
كل سنه وانتى طيبه
وعيد سعيد عليكى ( بعد اللى قريته اكيد هيكون سعيد .. مش فيه لحمه بقي )
وعلى الاسره كلها
كل سنه وانتي طيبه
وبالراحه ما تاكليش لحمه كتير عشان ما تتعبيش
حدوتة
وانت طيب يا سيدى
ومتخفش مش هملاه اوى ..تلات تربعه بس
سلام
...
عالمى ازرق
وانتى طيبة وبخير وعيد سعيد عليكى يا سكر
...
اسكندرانى اوى
يا جماعة انتو ليه محسسنى انى مفجوعة كده
دى تفاريح بس عشان العيد
انت لو شفتنى هتعرف انى باكل عشان اعيش مش بعيش عشان اكل والله
وكل سنة وانت طيب
ا((لا مـؤاخـذة ))ا
فاصـل إعلاني :)
زورونا تجدون ما يسركم .
قائمـة من الكتب الأدبية والثقافية والفكرية المتنوعة للعديد من دور النشر
تحت سقف واحد، وبأسعار لا تقبل المنافسة
وعيد أضحى ...كويس :)
كل سنة وانتي طيبة وعيد سعيد باذن الله
تحياتي
وكما قال الشاعر
لحمة يا دنيا لحمة ، لحمة وهبروا الحبايب
:D كل عام وانتم بخير
مدونة جميلة عجبتني
كل سنة وانت طيب
كل لحمة كويس
مدونة جميلة
اجرى خروف
عن العربية
دفعت موجة غلاء أسعار الأضاحي في عيد الأضحى المصريين إلى "تأجير" خروف العيد لأيام محددة، على أن يتم إرجاعه إلى مالكه تحت جنح الظلام.
http://www.alarabiya.net/articles/2007/12/19/43126.html
كل سنة وانتم طيبين
تحياتى
سندباد
وانت طيب وبخير يا عمنا
عيد سعيد عليك
...
محمود ماجد
مش ده برضه شعر الريس بيرة بتصرف
ولا يمكن حد تانى
بس المعنى ظريف برضه
كل سنة وانت طيب يا ابو حنفى
...
مروة الزارع
وانتى طيبة وبصحة وسلام
وشكرا على رأيك فى مدونتى المتواضعة
سلام
...
حب وحاجات تانية
حكاية تأجير خروف دى بدعة والله
طب ما الواحد يقعد يمأمأ ويخبط طول الليل وخلاص
وبعدين يعنى هم كانوا جيران رئيس مراجيح مولد النبى
اما خيبة والله
كل سنة وانت طيب
كل سنة وانتي طيبة يامريومة وربنا يعيد عليكي الايام وانتي في كل صحة وعافية يارب
كل سنه وانتى طيبه ومعيده وبالحمه مستفرده
كل سنه وانت طيب يا جميل
بقى نساك التبت برده
طيب ايه رأيك ان فاخر صاحبي قضى العيد في اسكندريه وبيقولي بنات اسكندريه كانوا مبدعين برغم البرد انما الموضه عندكم كانت البوت والكعب والجيبه القصيره وكانت هيصه في العيد
عموما بالهناء والشفاء انا برده بحب اللحمه جدا
كل سنه وانتي طيبه
سلااااااااام
truegove
وانتى طيبة وبصحة
والله واحشانى بجد انا مقصرة
عيد سعيد عليكى وعلى كل اللى بتحبيهم
...
رئيس جمهورية نفسه
مساء الفل يا مستر بريزيدنت
وايه السجع الجامد ده
ربنا يخليك
كل سنة وانت طيب
...
شن شن شنكوتىىىى
ازيك يا هوبا وازى شبرا وبنات شبرا
انشالله تكون عيدت وانبسطت يا جميل
وبعدين صوابعك مش زى بعضها
اكيد صاحبك ده مشافنيش لانى مش بنزل اصلا فى العيد عشان التحرش بقى وانت عارف
كل سنة وانت طيب
سلام
كل عام انت بخير
ايه هو ليه الكل باصص لك فى اللقمة
على رأى المثل الكحكة فى ايد اليتيم
تحياتى
Post a Comment
<< Home