وقت مستقطع
غمض عينيك وخد نفس
فاتت شهور
دول مش كفاية عشان تقول
عايز يا ناس ارجع احس
ترجع تحب؟
نسيت خلاص كل الوجع
نسيت يا قلبى اللى أندفع
راحت خلاص كل البقع
اللى على التوب النجس
ورجع نضيف
طاهر شفيف
وأشتقت تلبسه يا حزين
ملعون ابو ..أم الحنين
شوقك يا قلبى ده عبث
أنساه بقى
أنسى الغرام
أنسى الكلام
يا قلبى ما احلى الخرس
جرب كده
تميل على كتفى الضعيف
هتلاقيه قادر يشيل
واياك تميل..
بالذات عليه
دى القسوة فيه
غية وكيف
وأنت بغباء هتموت عليه
طب موت بقى
يمكن يحس
posted by مريم @ 7:02 AM
16 Comments:
ايه ده ليه كده رغم بساطة الكلام الا ان معانيه كبيره اوي برافو عليكي بس برضه ليه كده
وبعدين انا اسف علي التقصير بس ضغط الشغل بقي تحياتي
يجهل من يظن ان التسامح يكون على طول الخط
مهما تغير الظروف والضغوط
سندباد
يا عزيزى انا بقسو على نفسى بس
قلة حيلة بعيد عنك اهزقها هيا والوم قلبى وافقعه كلمتين عشان يفوق مش اكتر
وبالنسبة للتقصير فانا كمان مقصرة جدا يعنى بعتذر بدورى والمسامح كريم
...
الطائر الحزين
سيدى المحلق دائما وحياتك انت مستعدة اسامح واعدى بس المشكلة ان مفيش اى ريق حلو يخلى الواحد يتحمل كل الضرب ده من الدنيا والقدر والمدعوء اللى اسمه حب
حلو
بسيط و فى العمق
البنات لسه بيحكولك الولاد بتعمل فيهم ايه فى المنتزة ؟
عظمة على عظمة يا ست
ايوة كدة كانت فين المواهب دية من زمان يا ريت كل اسبوعين تلاتة حبة من دول
جيمى باشا
منور
وربنا يخليك ع الكلمتين الحلوين دول
على فكرة انا اصلا مبقتش اعرف البنات دول
الواحد مش ناقص
...
حدوتة
شكرا يا سيدى
بس مقدرش اوعدك بالمزيد انا بكتب اللى بتجود بيه السماء
جميلة
للأسف
جميلة فعلا
لك تحيتي
يا ساتر
بقى هو يعني لازم يموت علشان يحس
طب كان كفايه عليه قلم
على خده ينزل بالعفى
ينزل يدب يروح يقب
يفهم بقى معنى الكلام
يرمي الغباوه من الكلام
ويشيل ايديه الدفيانين جوه الجيوب
ويحطهم هنا في ايديا البردانين
ندفى سوا
بس خلاص مش هاكمل
علشان انتي بلطجيه اصلا واللي يجي عندك مش بتديله حتى سمكه صغيره يتعشى بيها
يا بخيله
سلااااااااااااااام
مصطفى السيد سمير
منور يا فنان
والله انت اللى جميل..متشكرة جدا
...
ايهاب
انا بلطجية ياله؟
وبعدين انت واخد الحياة ببساطة تغيظ
مش كل الناس بتعرف ترمى ورا ضهرها
بالذات انا
ياعم انا مش بخيلة انا قرارة وهقر عليك
ناس ليها شبرا وناس ليها العباسية
سلااااااااااام
واياك تميل..
بالذات عليه
دى القسوة فيه
غية كيف
وأنت بغباء هتموت عليه
طب موت بقى
يمكن يحس
قمة الحب اللى من القلب
و لا ده غلط
احيانا تكون القسوة هى ما يحتاجه غافل كى يفيق من سباته
احيانا اذا تمنينا الموت فلا نوهب الا الحياه
اتمنى ان يحس ولو لدقيقه واحده قبل الموت
--------
وحشتينى
قالوا الضربة اللي متموتش
بتقوي
وانا بقول
نقسي ع قلوبنا
و نجرح نفوسنا
و نبكي عيوننا
بايدينا
احسن من الغريب
ع الاقل هنعرف نداويها
تحياااااتي
ع روعة كلامك
و الصورة تحفة بجد
ابو خالد
مقدرش اقوللك ايوة
ساعات بنموت على حاجة واحنا عارفين انها هتأذينا
بس بنحتاجها عشان نحس اننا عايشين
وبرضه منكرش ان فيه حب ..طبعا فيه حب
بس بشكل مختلف
...
شيرين
المشكلة يا شيري انه خد ع القسوة
خلااااااااااااص قلبى نحس من كتر الضرب ياختى
ربنا يستر
...
angelic devil
على فكرة كلنا بنعمل فيها سبع رجالة فى بعض ونقعد نقول هنقسى على نفسنا وكل الكلام الجامد ده وبرضه مبنقدرش نمنع الجرح اللى من الغريب
طب وعلى ايه بقى ..المفروض نطبطب احنا على نفسنا مادام مش لاقيين ايد حنينة تطبطب علينا
شكرا على كل كلمة
سلام
مريوم الجميل
تسلم ايدك
بس انتى اجمد
زيفاجو
والنبى انت واخد فيا مقلب يا بورسعيدى
انا بق اسكندرانى
وشاعرة كمااان يا مريم ، طيب...
قصيدة حلوة فعلاً ، وإحساسك عالي فيها
على مستوى الوز أعتقد لمحت كسرتين
بس أنا هرجع أقرا كده ، وأشوف فيه حاجات تانية ولا إيه
.........
تحياااااااتي
وفي انتظـار المزيد
Post a Comment
<< Home