لوحدى
أمى الطيبة قوى
بتخوفنى
تطلعلى حتة اللانجرى ..الحرير
الأبيض القصير المثير
وتقوللى منفسكيش يا بت تبقى أم
مش بالذمة سؤال يعل
أمى الطيبة قوى
مش فاهمة حاجة خالص
أنا فعلا أم
ناقصنى بس عيل
ومش هفرط فيه
وهو جاى جاى
باى طريقة ممكنة
على رأى مالكوم
حتى لو رمانى اليأس فى حضن واحد
معرفوش
مبيحبنيش
ومبحبهوش
جواز مصلحة
المهم ان روح تخرج منى
يدب ع الأرض
يحلم..يحب ..يغلط
يحاول زى ما أنا حاولت
..والأهم
يعشقنى
زى ما بعشق أمى بالظبط
وأنا كمان هحبه قوى
وهربيه كويس قوى
وأضحك فى وشه ضحكة فيها شجن
هيفتكرها الرضا أو طيبة الأمهات
..المشكلة
إنى هفضل حاسة ان فيه حاجة نقصانى
وان أبنى البكر مات فى قلبى
وهفضل أبكى ع المخدة بالليل
لوحدى
posted by مريم @ 5:15 AM
6 Comments:
عندي نفس احساسك
نفسي ابقي ام
انا فعلا ام
لكن علشان بحب ابني قوي
زي مانت بتحبي ابنك
قررت
اختار ابوه
احبة ويحبني
علشان ابني
هيكون هدية الحب
التفاهم
ولو ملقتش دة
هفضل مستنية
ولو داهمني سن اليأس
هكون ام لكل طفل يقابلني
ومش هبقي ندمانه انه مش حتة مني
قبل ما تختاري الابن
اختاري الشريك
اشكرك على زيارتك
سمراء
اهلا بيكى فى مدونتى المتواضعة
اولا عشان اللى انتى بتقوليه ده انا قلت ان لو ده حصل هيبقى ابنى البكر مات فى قلبى
ابن الحب المقدس
لكن انا فعلا معرفش ممكن افرط فى امومتى لو ملقتش الراجل اللى احبه ويحبنى ولا لأ
لا يا مريم
اول مرة اكون مش متفقة معاكى
يعنى ايه تتجوزى واحد ما بتحبيهوش علشان تبقى ام ؟
ازاى يا مريم
الطفل لو ما كانش نتيجة حب بين الاب والام لما بيكبر ويحس
والاب لو ما كانش بينه وبين الام حب
هيبتدى يغير من ابنه اللى واخد كل اهتمام الام
وتبقى عيشه نكد
وبعدين لو ما كانش احنا نستاهل اننا نكون مع اللى بنحبهم .. مين يستاهل ؟
ياليت كما نبحث عما نحب
نقدر ان ان نحب ما نجد
وفقك الله
انا هعلق هنا ومش هعلق على شعر الماغوط
لانى بحب مواضيعك اكتر حتى لو اتقارنت بحد زى الماغوط
عاجبنى شعورك بس حاسس انه شعور غريب .. وعلى فكره ده مش شعورك لوحده .. لكن النهرده بنات كتيره ياست فى اصلاح الراجل او انها تتلاقى فيه الحضن الى ممكن يكون من خلاله الاب والزوج والصديق والعشيق حتى , بالتالى بيتجوزوا اى جوازه عشان يخلفو عيل والسلام
لكن هتفتكرى الولد او البنت الى هتخلفيهم هيغفرلك خطيئه انك جبتيه من اب مش بتحبيه ؟ بكل ما يترتب على ده من اثار جانبيه اقلها الطلاق
تحياتى
شيرين
انا فاهمة كلامك جدا
بس انا مش هخدع الراجل ده_لو جه يعنى
مش هفهمه انى الزوجة المحبة وانا فى الحقيقة طمعانة فى جيناته وبس
هوه هيبقى عارف انها صفقة وغالبا هيكون متجوز ومراته مش بتخلف
طبعا انا مش عارفة ظروفى بس انا من عيلة ولادة ومعندناش عقم يعنى ان شاء الله بخلف
طبعا ده سيناريو مستقبلى فنتازى ويا عالم
بس كان لازم احط احتمالات لانى بجد مش متخيلة انى مسمعش كلمة ماما
هتجنن لو ده حصل
انا عارفة انك هتفهمى
...
الطائر الحزين
يعنى احب وجعى ووحدتى والمى وقهرى
احب ايه بس وهوه ده اللى عندى
...
محمد حمدى
كويس انك معترف ان فيه بنات كتير بتفكر زيي
بس زى ما قلت لشيرين نا مش هخدع حد ومش هجرح ابنى
اكيد شريكى فى كروموزوماته_اللى هوه ابوه يعنى_هيكون بينى وبيه احترام ومع الوقت شئ من المودة يعنى مش هنكون بنكره بعض
لان انا فكرت طبعا فى المسألة دى ومتهيألى ان اسبابى هتفضل سر ومش ممكن ابنى يعرفها وطبعا ده حمل عشان كده انا قلت انى هفضل ابكى لوحدى
ارجو انك تفكر فى المسألة من وجهة نظر ست بتحلم تبقى ام من وهى طفلة لانى عارفة ان الرجل مش بيحس بالابوة حتى بعد ما يبقى اب فعلا الا مع مرور الوقت
Post a Comment
<< Home