كعادتها كل مساء..جلست على الاريكة..وتطلعت من النافذة..وأخذت ترقب قرص الشمس الاحمر الدامى وهو يوشك على المغيب..ارتشفت من فنجانها بعض القهوة وجعلت تتأملها وهى تذوب فى فمها على مهل..ثم نادت بأعلى صوتها
أم سحلول _واد يا سحلوووووووووووول ..انت يا منيل على عينك رد عليا
سحلول _عايزة ايه يا ولية
أم سحلول _ولية؟..الهى تتوكس اكتر ما انت موكوس..مش تحترمنى شوية يا وله
سحلول _يعنى اقولك يا أم سحلول هانم دى حتى مش راكبة على بعض
أم سحلول _مش راكبة عشان اسمك المعفن
سحلول _يعنى انا اللى كنت سميته لنفسك ماهى عملتكوا السودا
أ م سحلول _منه لله بقى أبوك قعدت اتحايل عليه نسميك الدياسطى على اسم جدك..كان هيبقى لك شنة ورنة ياله
سحلول _ماشى يا بنت الدياسطى باشا عايزة ايه فى يومك اللى مش عايز يعدى ده
أم سحلول _اقرالى الجرنال
سحلول _ماتدخلى نحو الأمية بقى وترحمينى
أم سحلول _هتقرا ولا أحدفك باللى فى رجلى
سحلول _هى بقت كده يعنى..بكرة اتجوز وموريكيش خلقتى
أم سحلول _وحياة امك لأجوزك على ايدى ..واحدة قوية ومفترية راضعة من بز حمار عشان تطلع عين أبوك
سحلول _ليه بس بتقفشى بسرعة يا سوكا يا عسل ده انا بحبك
أم سحلول _انت هتتمحلس ولا هتقرا
سحلول _هقرا اهو مفيش صبر...بيقولك يا ستى تعليق المفاوضات بين الجانبين الصينى وال_ام سحلول تقاطعه
أم سحلول _ان شالله يعلقوك فى قسم العمرانية يا بعيد..يا وله اقرالى حاجة عدلة
سحلول _طب بالراحة طيب..بيقولك يا ستى الفنانة م ع تنفى بشدة اجراءها لعملية نفخ فى الصدر وشد للوجه وتؤكد ان جمالها طبيعى
أم سحلول _ امال..هو فيه أحلى م الطبيعة
سحلول _الصراحة يا امة انتى الطبيعة ماشية معاكى عكس عكاس
أم سحلول _ازاى يا حبيب امك
سحلول _عاملالك نفخ فى الوش وشد فى الصدر
أم سحلول تخطف منه الجريدة وتقذفه بها_طب غور قبل ما أنفخك يا أهبل يا أبن الأهبل
