استجواب

لولا ان احمد زيدان هددنى بالنفسنة_الفحت كمان_كنت دلقته بصراحة لأن الأسئلة كتيرة ..بس انا هجاوب وامرى الى الله وبعد الشر عليك م النفسنة يا ضكطور

لو كنت مواطنة عربية مش مصرية ازاى كنت هتشوفى مصر ؟

رغم كل الحوادث اللى بنسمع عنها ..وشكوى المصريين اللى فى الخليج خصوصا من المعاملة الزبالة..لكن رغم كل شئ انا عندى ايمان عميق بالعروبة ومقتنعة جدا ان العرب عموما بيحبوا مصر ومؤمنينن بيها وعشمانين فيها

لو كنت مواطنة اوروبية ازاى كانت نظرتك للعرب والمسلمين؟

السؤال معناه انى اوروبية بس الباقى زى ما هو يعنى برضه مسلمة وانا بتخير مبادئى من خلال دينى وميلى لفكرة العدالة الاجتماعية والمساواة بين البشر..يعنى برضه كنت هبقى محايدة

لو قالولك انك بقيتى رئيسة جمهورية هتعملى ايه؟

اهو ده بقى سؤال استعراضى وعشان كده هجاوب بشكل استعراضى يعنى مانشيت واشطب ع التفاصيل..ما هو مش معقول بسهولة كده اقولك مصر تتحكم ازاى..لكن بشكل مبسط انا شايفة ان مشكلة مصر انها معرفتش الحكم الديمقراطى لحد انهاردة ..لو حكمت مصر فيكفينى انى امشى بعد ما اظبط الدستور تمام التمام واحميه من اللعب فيه مستقبلا وطبعا هلغى المادة 77 ..لأ انا هولع فيها بجاز وسخ ..ونبطل نمد فى فترات الحكم..واخيرا نشوف فيكى رئيس سابق يا مصر

اذا قمت بتأسيس حزب من تختاريه للانضمام اليه؟

احنا فى مصر معندناش احزاب اصلا الحكاية كلها تربيطات وطبعا الحزب الوطنى هو الروباطية الكبيرة

من هو الشخص الذى تختارينه رئيسا للجمهورية؟

للأسف معنديش اسم محدد وبعدين ما هو لازم حد يعرض برنامجه او حتى حلمه علينا..يخرج من بين الصفوف ويقول انا لها زى احمد مظهر فى واه اسلاماه كده

ما هى مميزات حكم مبارك الخارجية ومساوئ حكمه الداخلية؟

مش عارفة ليه حاسة ان الاتنين مرتبطين ببعض..احنا فى عهد مبارك فعلا تجنبنا معظم الحروب الممكنة فى الوقت اللى شهدنا فيه انحدار لتجربتنا الاشتراكية حتى تم اعلان وفاتها الرسمى السنة اللى فاتت..فى حين ان مصر لما كانت بتخوض حروب فعلا كانت تجربتها الاقتصادية مميزة جدا ومبشرة بالخير_أنا لما قريت ان معدلات النمو بتاعتنا كانت زى كوريا الجنوبية انا كان هيغمى عليا_النظم اللى حكمت مصر اشترت سلامتها وباعت موقفها لكن لللأسف ولا حصلنا عنب الشام ولا بلح اليمن..ده حتى اوربا وامريكا موصلوش للكمال الاقتصادى ده الا بعد ما حاربوا وقاتلو ودفنوا موتاهم وبعد كده اللى حصل حصل لان اللى يمشى فى طريق لازم يكمله لحد النهاية..واحنا مش فى سلام ده استسلام والفرق كبير ..وعمرنا ما هنشوف تقدم اقتصادى لان ده مش مسموح لنا عشان خاطر امن وسلامة حبيبة امها اسرائيل

كيف تتخيلى نفسك لو عشت فى عصر ازدهار الاندلس؟

كنت هتجوز ابن رشد واخلف فيلسوف وفيلسوفة صغنطتين

لو عندك ولدين وبنتين تسميهم ايه؟

يعنى هو ابوهم ده امعة يعنى..لما ييجى نبقى نتفق..بس ممكن اختار اتنين ..مريم وعلى

لو اكتشفتى ان الرجل الذى تحبيه لا ينجب كيف سيكون موقفك؟

والله انا لما بحب بحس ان حبيبى هو ابنى..صحيح طبعا انى نفسى جدا جدا اكون أم بس مقدرش اتخيل انى اتخلى عن الراجل اللى بحبه عشان السبب ده..ممكن نتبنى طفل او نكفله..وممكن اعمل لنفسى غسيل مخ وأقنعها أن المشكلة عندى أنا مش عنده هوه..هتصرف يعنى بس اكيد هنكمل مع بعض

ممكن ترتبطى برجل مطلق ؟

ممكن ان شاء الله

...

valentine

من 11 شهر5 الى 11 شهر 2 تسع شهور باليوم

تسع شهور ثم أخيرا تمخض الجبل اللى هو انا وولد..مش فأرا يا أوغاد ..انما أبتسامة..مجرد ابتسامة ناعمة ورقيقة وعذبة بما يليق بأبتسامة حقيقية

أبتسامة رضا..أبتسامة تحقق وأمتنان للقدر الذى أحسنت الظن به فمنحنى ما أرجو وأنتظر ..و أنا ما كنت أرجو أكثر من نهاية محترمة وشيك لعلاقة كانت رائعة جدا .. تعرفت من خلالها على أشياء كثيرة وجميلةأوجدها الله فى الدنيا لتخفف عنا الكثير من أعباءها وشجونها

أود أن أسجل أعجابى الشديد بالبتاع ده اللى أسمه أمل..والله العظيم رائع فعلا

...

ويبقى السؤال..مين الأهبل العبيط اللى قال أن الحب مينفعش يتحول لعلاقة فيها مودة وأحترام؟..

الاجابة..أنا.!!..ولأنى لا أخشى قول الحق ولا أتعالى على فكرة المراجعة ..فقد راجعت نفسى منذ زمن فى هذا الشأن..وأستطعت اخيرا أن أقنع الرجل الطيب الذى أحببته فى ماضى قريب بأن العشق الذى حملته له يوما قد تحول الى الكثير من التقدير والاحترام الذى كان موجودا منذ البداية ولكن عشقى كان يطغى على ما سواه

لم أدرك بعقلى الصغير ان بكائى وشكواى المستمرة بين ايديكم سترسم فى أذهانكم صورة خاطئة عنه وتجعله ايضا يتصور أنى احمل قلبا قاسيا وهو الذى لم يقسو يوما..وانما كل ما فى الأمر أننى حين اشكو..بتشحتف..فتأتى ردود أفعال القارئ بين انسيه او سيبك منه او احنا نروح القسم بقى

بالرغم من انى احببت رجلا قلما يوجد مثله وما حدث بيننا كان سؤ حظ وسؤ تقدير ..وسؤ توقيت ..وسوءات كثيرة حدثت رغم أنفى وأنفه

الحب..جميل..ويستحق أن يكون ذكرى جميلة

...

وانتوا بقى عاملين ايه دلوقت؟

انا فى الفالنتين ده قررت احتفل مع أشباهى من البتوع السينجلز على أساس ان الكابلز مقضيينها ومش محتاجين منى حاجة

بصوا بقى..انا مش عايزاكوا تشيلوا فى قلبكوا ولا تحقدوا على اى حد أبدا..وأوعوا تفتكروا أن الحب دباديب وارانيب وقلب أحمر..الحب فى القلب..طبعا ده مش اكتشاف ولا عبقرية منى لكن لازم يكون فيه ايمان عميق بالكلام ده..ومنسمحش لبعض الراغبين فى استغلال المشاعر الانسانية لتحقيق مكاسب مادية تجارية رأسمالية برجوازية متعفنة..بأنهم يلعبوا فى دماغنا ويخلونا نحس ان الحب بيتباع فى محلات الهدايا

أيها الأخوة السينجلز..دعونى أعلنها مدوية ..احنا بنحب ..والله العظيم بنحب ومتدهولين كمان..انتوا بتحبوا وانا بحب رجل ما قاعد دلوقتى فى مكان ما ..بيلثم قهوته..او يشرب ينسونه او حتى بيلعب فى مناخيره ..المهم انه قاعد ومستنينى زى ما انا مستنياه..وهييجى يعنى هييجى غصب عن عين أمه

المهم اننا منفقدش الامل مع الحب حتى لو كان اليومين دول بيستعبط وعامل نفسه ميت.. بس احنا بقى قاعدين له ..ورانا ايه..ورانا اييييييييييه؟

كل سنة وانتوا طيبين ..يا وحدانيين

...

لو مقدرتش تضحك

..متدمعش ومتبكيش

وان مفضلش معاك غير قلبك

اوعى تخاف

..مش هتموت

هتعيش

وان سألوك الناس عن ضى

جوه عيونك مبيلمعش

..متخبيش

قول لهم العيب مش منى

ده العيب فى الضى

اللعنة

من يغبطنى على همى؟..من؟

من يطمع فى هذا الحب؟

من يدرى بى..؟

لاأحد ..لا أحد..لا أحد

فأنا وحدى أخوض فيما أخوض..وأعانى ما أعانى..لا تخرج معاناتى من بين أسنانى

وحدى أتألم..ووحدى أسأل

أى جرم خطير أرتكبته..وبحق من..وأنا لم يمض من عمرى الا سنوات الطفولة التى نسمع ان فيها يرفع عنا القلم..وشبابى لم أعشه الا بين أربعة جدران..لم أخرج من قوقعتى لاؤذى أحد

أذن متى أثمت لأستحق هذا العقاب؟..ماذا فعلت ليصاب قلبى بتلك اللعنة الأبدية او التى تبدو كذلك

ألن يعرف الراحة أبدا هذا القلب؟

وهل أحكى؟..أمحو علامات الأستفهام التى تناثرت وأفضح نفسى؟حسنا

منهكة جدا جدا..لدرجة أنى أريد أن أفعل أى شئ على غير رغبتى..كأن أحكى أو أدخن..أو أجلس فى مقهى يشربون فيه الخمر حولى

ولكننى أخترت الحكى..عن ضعفى وسذاجتى التى قطعت شرايينى..فمنذ فترة وأنا أحكى عنه وأتغنى بعشقى..أخترت الفرح ليكون لغتى ومهنتى ..لا أقبل بعطاء غيره

كل هذه الأهازيج كتبت فى نعيي..حول جسدى المسجى بلا روح..وكان عشقى بويضة لم تلقح..سعت الى رحمى ولكن خاب رجاءها فتاهت فى الطريق

حمل كاذب..ككلمة أحبك التى أسمعها منه وكأنه يقول انشالله ما حد حوش

..

مزيد..؟

أستباح أنوثتى..يشعلنى .ثم تتململ نبرته فى أذنى..يقول هيت لك قبل أن يستخير الله فى أمرى..ويتركنى